Qeveria e Iranit ka reaguar pas sanksioneve të SHBA-së drejtuar institucioneve të tyre. Vendimi ky që vjen pas dëbimit nga Shqipëria të ambasadorit të shtetit islamik. Në reagim, Irani shprehet se projektuesi i skenarit të ngrirjes së marrëdhënieve diplomatike me Shqipërinë është SHBA.
Më tej, shteti islamik i Iranit thekson se Shtetet e Bashkuara të Amerikës po mbështesin sektin terrorist të MEK në Shqipëri dhe akuzat e rreme për sulmin kibernetik.
Shtetet e Bashkuara vendosën sanksione ndaj Ministrisë së Inteligjencës së Iranit dhe kreut të këtij institucioni, duke i akuzuar se qëndrojnë pas një sulmi kibernetik ndaj Shqipërisë, në muajin korrik.
Sanksionet e vendosura më 9 shtator, u tha se kanë të bëjnë edhe me aktivitete të tjera kibernetike të Republikës Islamike ndaj Shteteve të Bashkuara dhe aleatëve të tyre.
Ky njoftim vjen pasi Shqipëria, më 7 shtator, bëri të ditur për shkëputjen e raporteve diplomatike me Iranin, për shkak të sulmit të korrikut, dhe urdhëroi diplomatët iranianë dhe stafin diplomatik që të largoheshin nga shteti brenda 24 orësh.
Departamenti amerikan i Thesarit tha përmes një deklarate se Ministria e Inteligjencës dhe Sigurisë së Iranit drejton disa rrjete të autorëve të kërcënimeve kibernetike, përfshirë edhe ata që janë të angazhuar në spiunazh kibernetik dhe sulme kompjuterike, në mbështetje të Qeverisë iraniane.
Discussion about this post