Një ngjarje e rëndë është regjistruar në Velipojë në orët e para të mëngjesit të kësaj të diele. Pas një sherri banal për ndarjen e rërës dhe shezlongeve në plazh, 4 persona mbetën të vrarë dhe 2 të tjerë të plagosur.
Kujtim Ferracaku 59-vjeç, Xhovani Gocaj 25-vjeç, Edmond Gocaj 38-vjeç dhe Musaen Zeneli vetëm 20 vjeç mbeten të vdekur në vend pas përplasjes me armë të pronarëve të dy hoteleve.
Akoma më tragjik ishte fati i 20-vjeçarit që humbi jetën, i cili ditën e djeshme kishte filluar punën si kamarier në hotelin Gocaj. Dita e parë e tij e punës rezultoi fatale dhe rezultoi të ishte dhe dita e fundit e jetës.
Të afërm të 20-vjeçarit kanë pranuar se e ëma nuk kishte asnjë mundësi financiare për të mbuluar të paktën shpenzimet e funeralit të djalit të saj, që u nda nga jeta në lule të rinisë.
Një gjest tepër human dhe një shembull për të gjithë ka dhënë reperi Capital T. Ai është ofruar të ndihmojë familjen e djalit në komentet e postimit të opinionistit Olti Curri, ku të afërm të të ndjerit tregojnë se mamaja e Musaenit nuk paguan dot funeralin.
Pasi “Iconstyle.al” kontaktoi me reperin, ju bëjmë me dije se ai është ofruar të mbulojë pa zhurmë të gjitha shpenzimet e funeralit të Musaenit që mbeti i vrarë mëngjesin e sotëm.
Capital T do t’i gjendet pranë familjes në këtë moment kaq të vështirë, ndërsa gjesti i tij vlen si shembull për të gjithë ata që kanë mundësi të ndihmojnë sado pak nënën dhe vëllain e të ndjerit në këto ditë kaq të errëta.
“Iconstyle.al” ka komunikuar me familjarët e 20 vjeçarit dhe shumë shpejt do t’ju mundësojë një mënyrë (kontakt/llogari bankare) për personat që duan t’i vijnë në ndihmë familjes së viktimës.
