Deputeti demokrat Gazment Bardhi i është përgjigjur interesit të gazetarëve lidhur me lajmin e bërë publik nga “Zëri Amerikës” ku thuhej se PD kishte marrë 500 mijë euro financime nga rusët në vitin 2017 gjatë kohës që Lulzim Basha kishte qenë kryetar partie.
Në një deklaratë për mediat nga Kuvendi, Bardhi u përgjigj duke thënë se nuk kishte asgjë të re në artikullin e publikuar, duke theksuar mungesën e një dokumenti zyrtar. Gjithashtu ai tha se Basha e ka bërë vetë komentin e tij.
“Së pari unë njihem si Gazment Bardhi dhe mbaj përgjegjësi për çdo veprim timin, ajo që ju po thoni sot nuk ka asgjë të re, por i referohet diçkaje të vjetër. Për këtë gjë ka pasur një reagim nga ish-kryetari i PD-së Lulzim Basha para se të futesha në këtë konferencë. Nuk kam asnjë koment shtesë. Keni pyetje për milionerët, oligarkët që ndërtojnë pa leje? Veçanërisht mediat që financohen nga oligarkët duhet të tregojnë pak më shumë interes për këto ndërtime. Nuk thashë nëse e besoj apo jo Zërin e Amerikës. Por për rastin e zotit Berisha ka një vendim të DASH dhe për ne partneriteti me SHBA-të ka rëndësi strategjike. Cilindo të prekë kjo gjë, nëse cënohen marrëdhëniet me SHBA-të, ne do mbajmë anën e tyre dhe jo të individit. Unë nuk e kam parë, kam lexuar vetëm artikullin e Zërit të Amerikës, nuk pashë ndonjë dokument shtesë lidhur me këtë çështje”, tha Bardhi.
Discussion about this post