Indeksimi i pensioneve/ Koço Broka: Të caktohet minimumi jetik

Me datë 14 shtator qeveria mori dy vendime, një për indeksim pensionesh dhe tjetrin, për rritjen e pagës minimale. Ministrja Ibrahimaj tha se rritja e pensioneve do të jetë me 9.5%, ndërsa paga minimale shkon nga 32 mijë lekë, në 34 mijë lekë, duke u shprehur se këto janë vendime të rëndësishme të qeverisë, për të ndihmuar qytetarët të përballojnë krizën. Por, a janë vërtet efektive dhe produktive këto vendime në ekonominë e qytetarëve? Për të parë më qartë këtë çështje, Gijotina.com ka kontaktuar me ekspertin e ekonomisë Koço Broka.

Në një intervistë për Gijotina.com, eksperti Broka tha se i vlerëson këto dy vendime të qeverisë dhe i quan ato të duhura. Por, nga ana tjetër ai tha se këto rritje nuk janë efektive për të gjitha kategoritë, duke shtuar këto se përveç dy paketave të prezantuara nga qeveria do ishte e nevojshme edhe një paketë afatmesme, sidomos për pensionistët.

Broka tha se, rritja e pagës minimale mund të jetë një mbingarkesë për punëdhënësit e sektorit privat, ndërkohë që nuk sjellë rritje reale për punonjësit. Po ashtu, indeksimi i pensioneve është i vlershëm për ata që kanë pension mbi 40 mijë lekë, por i papërfillshëm për kategorinë që marrin pension më të ulët.

Më tutje, Broka u shpreh se në këtë pikë është i nevojshëm përllogaritja e minimumit jetik, i cili ka 30 vjet që nuk ndryshohet, kur çdo indikator tjetër ka ndryshuar. Ndërsa, vlerësoi vendimin e qeverisë për subvencionimin e pagesës së energjisë, eksperti tha se po aq e nevojshme është një paketë për qiranë dhe punësimin, pasi papunësia në sektorin privat ka rënë. Në këto kushte familjet e reja dhe studentët e kanë të pamundur të përballojnë qiratë dhe shpenzimet për shportën bazë. Në përfundim Broka, kërkoi që qeveria të marrë hapa transparentë duke menduar edhe me humanizëm për qytetarët, por edhe nga logjike për të mbajtur të qëndrueshëm nivelin ekonomik.

Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.