Gazetari turk Ahmet Emre Olur dëbohet nga Shqipëria edhe pse ai kërkoi azil politik. I ftuar në studion e Euronews Albania Arben Llangozi avokati i gazetarit turk sqaroi se policia shqiptare ka shkelur ligjin në këtë rast.
Avokati tha se kërkesa e klientit të tij për azil politik nuk u shënua fare nga policia në kundërshtim me ligjin, vetëm për faktin se shteti turk është më i fuqishëm se shteti shqiptar.
“Ne nuk kemi shtet, në rastin konkret ka qenë jo funksional. Në dorë s’e ka pasur më policia jonë por shteti turk se ligji për azilin i bërë në 2021e përcakton qartë që kur një i huaj i drejtohet vendit me një kërkesë për azil duhet ta marrë menjëherë dhe ta çojnë në vendqëndrimin e caktuar dhe i sigurohet një leje qëndrimi e përkohshme pasi procedurat zgjasin 6 muaj, nuk mund të dëbohet menjëherë. Kërkesa e tij nuk u shkrua fare se republika turke është më e fortë se shteti shqiptar”, tha avokati.
Ky nuk është një rast i izoluar ku shtetas turq kërkojnë azil në vendin tonë.
Në 2020 po në Rinas u ndaluan Selami Simsek dhe Harun Çelik të dyshuar si pjesë e lëvizjes se Fetullah Gylen, e shpallur organizatë terroriste nga Turqia.
Ata po udhëtonin nga Tirana për në Kanada me dokumente false dhe pas arrestimit kërkuan menjëherë azil në vendin tonë.
Kjo gjë u refuzua dhe ata u dëbuan drejt Turqisë ku dyshohet se u dënuan me burg.
Discussion about this post