I përfshirë në ngjarje kriminale, identifikohet vrasësi i 19-vjeçarit Erjon Xhenje

Është identifikuar autori i vrasjes së 19- vjeçarit Erjon Xhenje, ngjarje e ndodhur mbrëmjen e së dielës në Shkodër.

Për arsye hetimore emri i autorit nuk është bërë ende publik, ndërsa “Klan” mëson se ai është një person me precedentë të mëparshëm kriminale dhe i shpallur në kërkim si i përfshirë në një ngjarje të ndodhur pak kohë më parë në qytetin e Shkodrës.

Theksojmë sërish se policia nuk e ka bërë publik, emrin, por strukturat e saj po punojnë për kapjen e tij.

Ngjarja

Ngjarja ndodhi mbrëmjen e së dielës, rreth orës 20:10, pranë kryqëzimit të Kirasit, në zonën e njohur si “Rruga e Gjerë”. Erjon Xhenja ishte duke pirë kafe, ndërsa u qëllua nga autorët që po lëviznin me motoçikletë qëlluan me breshëri plumbash duke e lënë të vdekur në vend.

Atentati mendohet se është kryer nga dy persona që ishin të maskuar dhe lëviznin me motoçikletë. Njëri ka qëlluar nga distancë e afërt me 8 plumba pistolete. 5 plumba prekën trupin e të riut. Rreth 500 metra larg vendit të ngjarjes, në lagjen ‘Guerile’ është gjetur duke u djegur motoçikleta së bashku pistoletën që dyshohet se i përket autorëve.

Hetuesit shpresojnë që autorët të kenë lënë gjurmë tek arma e përdorur në krim. Në lokalin ku ndodhi ngjarja janë sekuestruar 5 kamera sigurie.