Rama paralajmëron: Fasha e energjisë do të vendoset në nëntor

Një ditë pasi njoftoi vendimin e Qeverisë për të anuluar rritjen e çmimit të energjisë elektrike për muajin tetor, kryeministri Edi Rama deklaroi sot se rritja e energjisë për fashën 800 kWh mund të vendoset në nëntor.

Gjatë një bashkëbisedimi në Facebook, kryeministri Rama bëri me dije se fasha do të vendoset në nëntor, megjithëse sipas tij në bazë të kushteve të motit, ky vendim mund të rimendohet sërish.

“Në muajin nëntor do të vendoset fasha duke pasur parasysh parametrat ose do t’i rikthehemi këtij vendimi duke pasur parasysh parametrat. Është e vërtetë që nuk është shtuar asnjë burim energjie. Ne kemi bërë një ndryshim shumë të rëndësishme në kontratat e bëra me hidrocentralet nga qeveria e mëparshme. Sot do ta çonin shpenzimin e buxhetit në pikën ku do të kishim një hap larg dhëmbët e falimentimit të shteti. Duke qenë se ne i rinegociuam ato kontrata, vendosëm një tavan edhe përballë jo vetëm investitorëve por dhe përfaqësuesve diplomatikë që na ulën në tavolinë dhe na kundërshtonin, ne kemi shumë më pak detyrime ndaj tyre. Në kushtet e kësaj krize kemi një fitim shumë më të madh në raport me atë që do të kishim, 300 milionë në vit”, tha Rama.

Ndonëse ditën e djeshme, kryeministri deklaroi se vendimi erdhi pasi ka pasur reshje shiu duke ndikuar në rritje e energjisë, Gijotina.com raporti dje arsyet e vërteta që çuan në marrjen e këtij vendimi.

Sipas burimeve, Partia Socialiste ka organizuar një sondazh në lidhje me rritjen e çmimit të energjisë për familjet që do të harxhonin më shumë se 800 kWh dhe normalisht që rezultatet nuk i kanë pëlqyer, pasi njerëzit pritej që të irritoheshin jashtëzakonisht shumë dhe të ngriheshin në këmbë kjo pasi në valën e rritjes së çmimeve nuk mund të përballohej edhe një rritje e çmimit të energjisë.

Burime për Gijotina.com bëjnë me dije se ky sondazh është zhvilluar brenda partisë socialiste dhe ka hasur në shumë kundërshti dhe kjo do ishte një goditje e madhe për PS-në para zgjedhjeve lokale që pritet të mbahen në 2023.

Ndërkohë që po të njëjtat burime bëjnë me dije se ai mund të tërhiqet edhe nga amnistia fiskale pasi edhe këtu ka hasur kundërshti të fortë brenda PS-së.