Policia e Tiranës ka finalizuar aksionin e koduar “Escaper”.
Mësohet se operacioni i befasishëm u krye nga Komisariati nr.3 i kryeqytetit me qëllim goditjen e veprimtarisë kriminale në fushën e armëmbajtjes pa leje. Gjithashtu, sipas informacioneve bëhet me dije se një 41-vjeçar që kishte thyer masën e sigurisë dhe qarkullonte me armë zjarri dhe municion me vete, ka rënë në pranga. Ndërsa 3 të tjerë, janë proceduar penalisht për moskallëzim krimi.
Gjatë aksionit janë sekuestruar një armë zjarri pistoletë, një krehër dhe municion luftarak.
Shërbimet e Komisariatit të Policisë Nr. 3, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar dhe në informacionet e marra në rrugë operative se në rrugën “Jordan Misja”, qarkullonte një shtetas i armatosur, kanë organizuar punën dhe kanë finalizuar me sukses operacionin policor të koduar “Escaper”.
Si rezultat i këtij operacioni, u bë kapja dhe arrestimi në flagrancë i shtetasit:
– P. S., 41 vjeç, banues në Tiranë, për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Gjithashtu, nisi procedimi penal në gjendje të lirë për shtetasit B. D., 33 vjeç, B. H., 51 vjeç dhe L. M., 26 vjeç, për veprën penale “Moskallëzimi i krimit”.
Gjatë kontrollit fizik ndaj shtetasit P. S., shërbimet e Komisariatit të Policisë Nr. 3 i gjetën dhe i sekuestruan, në cilësinë e provës materiale, një armë zjarri pistoletë, një krehër dhe municion luftarak.
Nga verifikimet ka rezultuar se shtetasi P. S. kishte thyer masën e sigurisë “Arrest në shtëpi, të caktuar nga Gjykata, për veprën penale “Heqja e paligjshme e lirisë”.
Shtetasit B. D., B. H. dhe L. M. kanë patur dijeni për krimin, por nuk kanë kallëzuar në Polici.
Materialet i kaluan Prokurorisë, për veprime të mëtejshme procedurale.
Discussion about this post