Prokuroria e Lezhës ka kërkuar 35 vite burg për Albert Kacën, i cili përplasi për vdekje me makinë ish kunatin e tij, Ylli Menën. Kjo masë dënimi është kërkuar nga prokuroria e Lezhës, e cila dha në gjykatë konkluzionet përfundimtare në lidhje me këtë çështje.
32-vjeçari Kaca akuzohet për veprën penale “Vrasje e kryer brenda rrethit familjar” dhe sipas organit të akuzës është arritur të provohet se i pandehuri e ka goditur me dashje për vdekje me makinë ish-kunatin e tij Ylli Mena.
Ngjarja ka ndodhur në 21 shtator të vitit 2019, ku marrëdhëniet mes Menës dhe Kacës ishin përkeqësuar pasi Mena kishte vendosur t’ia divorconte motrën.
Kjo gjë ka sjellë përplasje mes dy familjeve në Mamurras të Lezhës. Por situata është përshkallëzuar akoma më tepër në muajin shtator 2019, ku 32-vjeçari Albert Kaca, ka goditur për vdekje ish-kunatin e tij me makinë, teksa Ylli Mena ishte duke ecur në rrugë me biçikletë. Pas goditjes, autori i krimit është larguar me shpejtësi, por më pas u arrestua nga policia.
Discussion about this post