Në mesin e 38 personave që janë arrestuar për drogë në kuadër të bashkëpunimit mes antimafias italiane dhe SPAK-ut, janë dhe disa zyrtarë shqiptarë.
Në Shqipëri janë arrestuar: Prokurori i Vlorës, Maksim Zota, Ilirjan Balla, ish-nën drejtor i Vlorës, aktualisht shefi i sektorit kundër trafiqeve. I arrestuar Saimir Kurti drejtor i zyrës së punës në Kavajës, si dhe Festim Lelaj, ish-oficer policie.
Operacioni i gjerë kundër trafikut ndërkombëtar të drogës, korrupsionit, abuzimit me detyrën dhe pastrimit të parave po zhvillohet ndërmjet autoriteteve shqiptare dhe Drejtorisë së Hetimit Antimafia Italiane, ku si rezultat janë lëshuar 38 urdhër-arreste, nga këta 10 persona të arrestuar më parë. Arrestimet po kryhen në Shqipëri, Itali, Spanjë dhe në Mal të Zi, ndërsa po ashtu është urdhëruar edhe konfiskimi i disa pasurive të luajtshme dhe të paluajtshme, që kapin vlerën e disa miliona eurosh. Në mesin e personave të dyshuar janë 5 punonjës policie dhe 1 prokuror.
