Ben Hodges, ish-gjenerali komandant i Ushtrisë së Shteteve të Bashkuara në Evropë, thotë se ai beson se një çlirim i gadishullit të Krimesë të pushtuar nga Rusia është i mundur deri në verën e vitit të ardhshëm. “Kur shikoj situatën, shoh se situata e rusëve po përkeqësohet çdo javë”, ka thënë Hodges për gazetën gjermane Frankfurter Allgemeine Zeitung.
“Ata thonë se lufta është një test i vullnetit dhe logjistikës – dhe në të dyja aspektet Ukraina është shumë më superiore”.
“Rusët duhet ta humbin [luftën]; përndryshe, ata do të provojnë përsëri pas dy ose tre vjetësh”, ka shtuar ai. Sipas pikëpamjes së Hodges, “një shpresë” e udhëheqjes ruse është se Perëndimi do të lëkundet në mbështetjen e tij për Ukrainën.
Në anën tjetër, zëdhënësi i Kremlinit, Dmitry Peskov thotë se Rusia po i përmbahet qëllimeve të saj ushtarake në Ukrainë, pavarësisht mbështetjes perëndimore për vendin.
NATO është tashmë një pjesë “de facto” e konfliktit, por kjo nuk do të ndikojë në qëllimet e Rusisë, ka thënë Peskov për agjencinë e lajmeve Interfax.
Megjithatë, qeveria gjermane dhe shtetet e tjera të NATO-s thonë se nuk janë palë në luftë. Ndihma për Ukrainën shihet si mbështetje për të drejtën e vetëmbrojtjes së vendit që përpiqet të anëtarësohet në BE dhe NATO.
Discussion about this post