Vdekja e 32-vjeçarit/ Balliu: Pushteti është kthyer në vrasës ndaj qytetarëve

Shefi i organizimit në Partinë Demokratike, Klevis Balliu ka reaguar për vdekjen e 32-vjeçarit Lear Kurti pas arrestimit nga policia. Në një postim në Facebook, Balliu, duke iu referuar raportimeve, thotë se i riu ka ndërruar jetë në ambientet e policisë.

Sipas Balliut, pushteti është kthyer në kërcënim vrasës për vetë qytetarët.

Postimi i Klevis Balliut:

Një i ri humb jetën brenda institucioneve të Policisë së pushtetit. Lear Kurti vetëm 32 vjeç ka gjetur vdekjen pas arrestimit nga Policia e Shtetit në Komisariatin nr. 3 në kryeqytet.

Ngjarja dramatike ka shokuar familjen dhe mbarë shoqërinë. Policia ka njoftuar se i ndjeri Lear Kurti vuante nga epilepsia dhe ishte përdorues droge. Por babai i tij e mohon që djali i tij 32 vjeç të ketë pasur probleme shëndetësore.

Spitali i Traumës ka njoftuar se i riu ka mbërritur pa shenja jete në spital. Çka do të thotë se i ndjeri ka ndërruar jetë në ambientet e Policisë së Shtetit.

Ky nuk është rasti i parë kur një i ri gjen vdekjen brenda institucioneve të Policisë. Fakt është se pushteti është kthyer në kërcënim dhe vrasës për vetë qytetarët. Shpreh ngushëllimet e mia më të sinqerta për familjen Kurti.