Sulmuesi i Borussia Dortmundit, Sebastien Haller është rikthyer në fushën e stërvitjeve, tre muaj pas ndërhyrjes kirurgjike që e pati në testikuj për shkak të një tumori të shfaqur.
Haller qëndroi jashtë fushës së blertë nga muaji korrik pasi Verdhezinjtë kishin njoftuar se lojtari duhej t’i nënshtrohej një kimioterapie, pak pasi ishte transferuar nga Ajaxi për 31 milionë euro.
Të hënën, trajneri i Ajaxit, Alfred Schreuder zbuloi se Haller kishte kërkuar të ushtronte me ish-klubin e tij dhe se ndërkohë është duke e vazhduar rehabilitimin e tij, shkruan “Gazeta Express”.
“Ai kërkoi nga ne që të vinte dhe të ushtronte pasi është duke e kryer rehabilitimin këtu. Natyrisht, është e mrekullueshme që ta kemi këtu për një kohë. Ai është i gatshëm dhe në gjendje të ushtrojë në një fushë të veçantë, e cila do ta ndihmojë që të rikthehet”, ka thënë Schreuder.
Haller i kishte realizuar 47 gola në 66 ndeshje me Ajaxin, të cilit i ishte bashkuar vitin e kaluar nga West Ham United.
Ai i shënoi 11 gola në 8 ndeshje të sezonit të kaluar në Ligën e Kampionëve, duke e arritur maksimumin e karrierës, shkruan “Gazeta Express”.
Gjithashtu, ai i ka bërë 15 paraqitje me Bregun e Fildishtë, derisa më parë e kishte përfaqësuar Francën për të rinj.
Haller do të mundohet ta rikthejë formën e dikurshme dhe ta ndihmojë Dortmundin, duke tentuar ta zëvendësojë Erling Haalandin e larguar.
Discussion about this post