Java e 10-të foli totalisht në favor të Tiranës. Bardheblutë mposhtën 4-1 një rival direkt si Kukësi dhe, duke përfituar edhe nga humbja e Partizanit, janë vetëm 1 pikë larg kreut. Pjesa e parë nisi me ritëm, por golat do të vinin vetëm në fundin e këtij fraksioni. Florent Hasani bëri gjithçka vetë duke shënuar golin e avantazhit për bardheblutë në minutën e 43-të. Por goli i barazimit do të vinte shumë shpejt, pas 4 minutash. Edi Basha realizon për verilindorët pas një pasimi akrobatik të Gabriel Barbosës, me kroatin që mposht Visar Bekajn. Kukësi mbetet me 10 lojtarë në minutën e 59-të pas ndërhyrjes së gabuar të Ndrecës. Fillimisht ndëshkohet me të verdhë, por pas pamjeve nga VAR jepet i kuqi. Tirana shton forcat dhe në 72’ kalon sërish në avantazh. Pas një goditje dënimi të ekzekutuar nga Kallaku në të djathtën, Behiratçe gjuan me kokë dhe mposht Tafas.
Në minutën e 81-të Tirana do të vriste ndeshjen me golin e Patrik. Në fund kishte vend edhe për Limaj, që realizon saktë nga pika e bardhë e penalltisë. Ndërsa Partizani u turpërua nga Egnatia në Rrogozhinë me rezultatin 3-0. Të besuarit e Shpëtim Duros, pasi mposhtën Kukësin, thyejnë edhe një pretendent tjetër.
Të dyja skuadrat kërkuan me ngulm golin që në fillim, më pas ishte radha e protestave nga të dyja palët për penallti, por që akordohet vetëm në minutën e katërt shtesë për rrogozhinasit. Fernando nuk fal nga pika e bardhë.
Ende pa u shuar entuziazmi i golit të parë, vendasit festojnë sërish. Bitri humbet një top pranë zonës dhe aksioni që finalizohet nga Zejnullai. Një mbyllje perfekte e pjesës së parë nga Egnatia.
E dyta nisi në sulm nga Partizani, me shpresën për të marrë të paktën një pikë, por Zejnullai shënon golin e tretë në 70’ pas kundërsulmi të shpejtë. Partizani nuk arrin të shënojë qoftë një gol nderi dhe del me kokën ulur për herë të parë gjatë këtij sezoni në transfertë.
Discussion about this post