Pas blerjes së Twitter, njeriu më i pasur në botë, Elon Musk, pritet të bëjë disa ndryshime në këtë rrjet social. Njëri prej tyre është edhe kthimi i disa personaliteteve të cilët ishin ndaluar më parë.
Musk ka thënë më parë se ishte e gabuar që ish-presidenti amerikan Donald Trump të ndalohej dhe ka pasur spekulime se ai mund të kthehej, por jo vetëm.
Edhe Martin Shkreli, i njohur si “shqiptari më i urryer në SHBA”, mund të jetë pjesë e listës që Musk ka vendosur t’ua heqë ndalimin në Twitter, raporton SkyNews.
Shkreli ishte pjesë e një skandali me një kompani farmaceutike të cilën zotëronte. Ai pati rritur çmimin e një ilaçi që shpëtonte jetë nga 13.5 dollarë në 750 dollarë për pilulë. Trumpi ishte kritik ndaj kësaj lëvizje dhe e kishte quajtur Shkrelin si “djalë të llastuar”.
Ai u ndalua nga Twitteri pasi ngacmoi gazetaren Lauren Duca. Shkreli kreu një dënim me burg, por u lirua në maj të këtij viti.
Musk në anën tjetër pasi finalizoi blerjen e Twitterit kishte shkruar “zogu u lirua”. Shefi i Teslas e përshkruan veten si avokat të fjalës së lirë. Që nga fillimi i tij, Twitteri ka ndaluar një numër llogarish të profilit të lartë për shkelje të politikave të tij të përdoruesve.
Përveç Trumpit e Shkrelit, Twitteri mund t’ia heqë ndalimin Katie Hopkinsit, George Zimmermanit, David Icke, Tommy Robinsonit, Milo Yiannopoulosit, Azealia Banksit, Alex Jonesit dhe Steve Bannonit.
Discussion about this post