Tjetër aksident në Vlorë, furgoni përplas këmbësoren

Një tjetër aksident është regjistruar sot në Vlorë, ku një furgon ka përplasur një këmbësore, e cila për pasojë ka mbetur e lënduar.

Aksidenti ka ndodhur pranë rrugës së spitalit të qytetit, ndërsa raportohet se gruaja ndodhet jashtë rrezikut për jetën.

“Rreth orës 17:20, në rrugën ‘Ali Demi’, mjeti furgon me drejtues shtetasin K. D., 22 vjeç, banues në lagjen ‘Partizani’, ka aksidentuar këmbësoren shtetasen N. B., 47 vjeçe banuese në fshatin Armen, e cila ndodhet në spitalin e Vlorës, nën kujdesin e mjekëve”, njofton policia.

Drejtuesi i mjetit, shtetasi K. D., u shoqërua në Komisariat, për veprime të mëtejshme, ndërsa në vendngjarje ndodhet grupi hetimor, i cili po punon për sqarimin e plotë të rrethanave të aksidentit, shtuan të njëjtat burime.

Më herët, një turiste franceze humbi jetën pasi u përplas nga një automjet, teksa lëvizte me biçikletë.