Nesër kombëtarja shqiptare do të luajë ndeshjen miqësore ndaj Katarit në Spanjë. Përbërja është me lojtarë nga kampionati vendas. Javën e ardhshme janë përcëktuar për tu zhvilluar edhe dy ndeshje miqësore të tjera, kundër Italisë dhe Armenisë në “Air Albania”.
Përpos këtij fakti, ajo që mbetet një temë e hapur për përfaqësuesen është e ardhmja e stolit.
Edi Reja është në muajin e fundit të kontratës dhe me shumë mundësi nuk do të vazhdojë të drejtojë kuqezinjtë. Pavarësisht se në asnjë moment një gjë e tillë nuk është konfirmuar.
Trajneri italian ka shprehur dëshirën për të vazhduar me Shqipërinë në daljet e tij në media. Nga ana tjetër, presidenti i FSHF-së është treguar i kujdesshëm dhe nuk e ka konfirmuar në asnjë moment 77-vjeçarin, por as nuk është shprehur që Edi Reja e ka mbyllur bashkëpunimin.
I vetmi fakt që është kuptuar, mbetet që palët do të ulen për të biseduar për kontratën. Në kohën kur ajo të përfundojë, në ditët e fundit të nëntorit, që praktikisht llogaritet pas miqësoreve me Italinë dhe Armeninë.
Është përfolur shumë kohët e fundit për trajnerin që mund të zëvendësojë Edi Rejën, madje u ka dalë emri edhe disa teknikëve shqiptarë.
Mësohet se ish-trajneri i Milanit, Marko Xhampaolo, është në “pole position” për të marrë drejtimin e Kombëtares shqiptare.
Madje, tekniku italian 55-vjeçar është edhe një dëshirë e vetë kreut të FSHF-së dhe gjasat janë që të jetë ai drejtuesi i ri në stolin kuqezi.
Xhampaolo nuk është një pistë e re për Shqipërinë. Kjo sepse është tentuar pas largimit të De Biazit dhe në vazhdim në stol u ul Panuçi.
Ish-trajneri i Sampdorias, i cili u zëvendësua nga Stankoviç vetëm pak javë më parë. Aktualisht ai është pa ekip. Marko ka lindur në Belizona të Zvicrës. Ai ka filluar karrierën si ndihmës-trajner dhe më pas në vitin 2006 trajner i parë i Kaljarit.
Ndërsa ekipi që ai ka qëndruar më shumë është Sampdoria, që nga viti 2016 deri në 2019-ën. Me një total prej 123 ndeshjesh në pankinë.
Pas ecurisë së mirë me xhenovezët, Xhampaolo mori drejtimin e Milanit. Por u largua më shpejt sa pritej, duke drejtuar kuqezinjtë për 3 muaj dhe vetëm 7 ndeshje.
Në fakt interesant është që Xhampaolo ka drejtuar pesë ekipe të njëjtë me Edi Rejën. Si: Torino, Bresha, Kaljari, Katania dhe Trevizo, por në kohë të ndryshme.
Discussion about this post