Sfida të rëndësishme dhe tepër të forta për tre skuadra shqiptare ditën e sotme. Shkëndija, Laçi dhe Prishtina janë gati për duelet e tyre në kompeticionet europiane.
Kampionët e Maqedonisë së Veriut i vuri shorti përballë Mura në raundin e parë të Champions League. Një rival i vështirë për kuqezinjtë nga Tetova, që takimin e parë ndaj kampionëve të Sllovenisë do e luajnë në shtëpi.
Ndeshja do të zhvillohet në “National Arena Toshe Proeski” të Shkupit, duke nisur prej orës 20:00. Skuadra e Ernest Gjokës do të synojë rezultat pozitiv, për të hedhur një hap drejt kualifikimit.
Dy orë më herët zbret në fushë Prishtina e Zekirija Ramadanit. Kampionët dardanë kanë kundërshtarin më të vështirë, Ferencvaros e Myrto Uzunit.
Ndeshja e parë e raundit të parë të Champions League, do të luhet në “Groupama Arena” të Budapestit, me bardhekaltrit kryeqytetas që do të bëjnë maksimumin për të siguruar një rezultat pozitiv ndaj kampionëve të Hungarisë.
Transfertë edhe për Laçin e Shpëtim Duros. Bardhezinjtë e Kategorisë Superiore, rregullisht pjesëmarrës në vitet e fundit në kompeticionet europiane, do të sfidojnë Podgoricën në raundin e parë të Conference League.
Ekipi kurbinas ka si objektiv kualifikimin ndaj skuadrës nga Mali i Zi. Ndeshja e parë do luhet në “DG Arena” të Podgoricës, përballje që nis në orën 20:30.
