Komisioni i Posaçëm i Apelimit ka lënë jashtë drejtësisë përfundimisht gjyqtarin Petrit Aliaj, pjesë e trupit gjykues që shpëtoi Dritan Dajtin nga burgu i përjetshëm.
Në njoftimin e vendimit, bëhet me dije se vendimi është marrë sor, nga trupi gjykues i përbërë nga Ina Rama kryesuese, Albana Shtylla relatore, Natasha Mulaj, Rezarta Schuetz, Sokol Çomo anëtarë.
Aliaj ishte shkarkuar më herët nga Komisioni i Pavarur i Kualifikimit, në seancën e mbajtur më 15 qershor të vitit 2020, por Aliaj e apeloi këtë vendim.
KPA ka gjetur parregullsi të shumta në pasurinë e gjyqtarit, mes të cilëve edhe një pallat në emrin e babait të tij.
Gjithashtu Komisioni konstatoi probleme në ndërtimin e një ndërtese tre katëshe me vlerë 70 mijë euro, si dhe një truall në Delvinë. Gjyqtari nuk justifikonte as shpenzimet për shkollimin e fëmijëve.
Petrit Aliaj ishte pjesë e trupës gjykuese në procesin për heqjen e burgimit të përjetshëm ndaj Dritan Dajtit. Ai është shkarkuar edhe më herët në 2004-ën nga KLD, por Gjykata e Lartë e ktheu në detyrë. Në vitin 2015, ILDKPI e kallëzoi gjyqtarin për fshehje pasurie, por KLD nuk e shkarkoi.
Njoftim vendimi:
Trupi gjykues i Kolegjit të Posaçëm të Apelimit, i përbërë nga Ina Rama kryesuese, Albana Shtylla relatore, Natasha Mulaj, Rezarta Schuetz, Sokol Çomo anëtarë, shpalli vendimin për çështjen (JR) nr. 48/2020, datë 10.11.2020, që i përket ankimit të subjektit të rivlerësimit Petrit Aliaj kundër vendimit të Komisionit të Pavarur të Kualifikimit nr. 260, datë 15.06.2020.
Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
- Lënien në fuqi të vendimit nr. 260, datë 15.06.2020 të Komisionit të Pavarur të Kualifikimit, që i përket subjektit të rivlerësimit Petrit Aliaj.
- Ky vendim është përfundimtar dhe ka efekt të menjëhershëm.
U shpall sot, në Tiranë, më datë 16.11.2022.
Discussion about this post