Hetimet e SPAK për inceneratorin e Elbasanit kanë rënduar pozitat e ish-deputetit socialist Aqi Bllako. Përveç akuzës së “shpërdorimit të detyrës”, kryer në bashkëpunim, Prokuroria e Posaçme ka ngritur ndaj Bllakos edhe akuzën e “korrupsionit”
Mësohet se pas sekuestrimit të kompjuterit të ish-deputetit dhe pas marrjes së tij si i pandehur, janë gjendur prova që e implikojnë atë në korrupsion të zyrtarëve të lartë.
Sipas SPAK, Alqi Bllako ka shkëmbyer e-maile nga adresa e tij private me administratorin e kompanisë “Alb tek energy”, Klodian Zoton duke e informuar këtë të fundit mbi procedurën e dhënies me koncension të inceneratorit të Elbasanit.
Referuar dosjes, ai i përcillte Zotos e-mailet e zyrtarëve të Ministrisë së Mjedisit mbi procedurat që duhet të ndiqte për të fituar të drejtën e ndërtimit të inceneratorit të Elbasanit.
Referuar hetimeve të kryera, këto kontakte janë mbajtur në kohën që Bllako ushtronte detyrën e sekretarit të përgjithshëm në Ministrinë e Mjedisit dhe prokuroria ka dyshime se ish-deputeti të ketë paracaktuar garën duke shpallur fituese kompaninë që përfaqësohej nga Klodian Zoto.
Tre ditë më parë, Bllako është njohur edhe me akuzën e re që SPAK ka ngritur ndaj tij, për inceneratorin e Elbasanit.
Deri mbrëmjen e djeshme SPAK nuk ka kërkuar masë tjetër sigurie ndaj ish deputetit, por nuk përjashtohet mundësia që një kërkesa të jetë depozituar mëngjesin e sotëm për një masë të dytë. Pritet që në vijim SPAK të dalë me deklaratë edhe për inceneratorin e Elbasanit.
Discussion about this post