Pesë të arrestuarit e SPAK për inceneratorin e Fierit kanë dalë sot në gjykatë. Togat e zeza nisën me shqyrtimin e masave të sigurisë që prej orës 11: 30. Bëhet fjalë për pesë nga 11 personat për të cilët SPAK kishte marrë më herët nga gjykata një masë “arrest me burg” në mungesë.
Konkretisht, janë shtetasit Arben Dervishaj, Regan Merdani, Gentian Zifla, Robert Shabani dhe Enver Sheshi, një i gjashtë është në masën arrest shtëpiak ndërsa vazhdojnë të jenë në kërkim edhe pesë persona të tjerë të dyshuar për çështjen e inceneratorit të Fierit, çështja e të cilit kulmoi në marsin e këtij viti, pas çështjes së regjistruar në vitin 2020.
Akuzat që rëndojnë mbi të arrestuarit e fundit janë: Korrupsioni pasiv, korrupsioni aktiv, shpërdorimi i detyrës, mashtrim me pasoja të rënda me skemat e TVSH-së.
Njëri prej tyre Arben Dervishaj, ka pasur rolin e mbikëqyrësit sa i takon punimeve në inceneratorin e Fierit, dyshohet për korrupsion pasi ka firmosur situaciona false sa i takon punimeve që në të vërtetë nuk ishin realizuar.
Ai gjithashtu dyshohet se është korruptuar nga shoqëria koncensionare në udhëtime me destinacion Italinë ku ka ndjekur ndeshje futbolli.
Edhe 4 të tjerët janë administratorë të tetë kompanive private që firmosën punimet dhe u bënë shkak që shoqëria koncensionare të kishte fitime.
Në marsin e këtij viti në lidhje me këtë çështje u vendosën arrest me burg ish-Ministri i Mjedisit Lefter Koka dhe ish sekretari i Përgjithshëm i kësaj ministrie Alqi Bllako. Në këtë skemë numri i personave të dyshuar ka shkuar në 20 ndërsa SPAK vijon hetimet edhe për të tjerë.
Gazetarja Anila Hoxha bën me dije se se në seancën me dyer të mbyllur secili prej të arrestuarve kërkon lehtësim të masave pasi sipas tyre nuk ka rrezik ikjeje.
Discussion about this post