Problemet financiare në njërin krah dhe pandemia në tjetrin, ishin një goditje e rëndë për sportet me dorë në vend, që ndryshe nga futbolli, e kanë shumë të vështirë për të rimarrë veten.
Megjithatë, sinjale pozitive ka, dhe një prej tyre është rikthimi i kombëtares së volejbollit të meshkujve, e cila u ndal për një periudhë 2-vjeçare, në një prej momenteve të saj më të mira. Kuqezinjtë e rrjetës kanë nisur përgatitjet për kualifikuesit e Kampionatit Evropian, që luhen në muajin maj, dhe përtej vëshitrësive të krijuara më së shumti nga pandemia, kërkojnë të lënë gjurmë në turneun më të rëndësishëm të kontinentit.
Skuadra vjen me ndryshime, disa të detyruara për shkak dëmtimesh, gjithashtu jo në formën më të mirë, të krijuar nga qëndrimi i gjatë pa aktivitet. Megjithatë, numri një i stolit të djemve, trajneri Jani Melka, beson te skuadra, njësoj si katër vite më parë, kur Shqipëria nisej jo si favorite dhe në fund ishte vetëm një hap larg realizimit të ëndrrës së kualifikimit. Shqipëria sfidon Sllovakinë, Rumaninë dhe Zvicrën në grupin e saj, me ndeshjet që nisin prej datës 6 Maj, ndërsa do të zhvillohen me sistem grumbullimi në Sllovaki dhe Rumani.
Discussion about this post