Autori i të shtënave me armë ditën e djeshme në selinë e Partisë Demokratike pas një konflikti me nënkryetarin e degës Kastriot Marku, Van Rica është vënë në prangat e policisë pas arratisë që zgjati më pak se 24 orë.
Rica nuk është një emër i panjohur në radhët e Partisë Demokratike të Kurbinit, pasi ai prej vitesh është anëtar i kësaj dege dhe aderon në strukturat e partisë.
Mësohet se Rica punonte në një polici private në qytet dhe se arma e përdorur në ngjarjen e mbrëmshme mund të jetë ajo e shërbimit. Sipas Policisë, ajo është gjetur në vendin e ngjarjes bashke me gëzhojat pas largimit të Ricës.
Anëtarësimet e reja besohet të kenë qenë dhe ‘molla e sherrit’ mes Markut e Ricës në një kohë ku na ndajnë vetëm pesë ditë nga mbajtja e primareve në PD.
Ngjarja ka ndodhur mbrëmjen e djeshme rreth orës 17:30 në degën e Partisë Demokratike në Kurbin. Pas një konflikti verbal mes Katriot Markut me detyrë nënkryetar i degës dhe Van Ricës për shtimin e disa simpatizantëve që do të votonin në primare më datë 4 dhjetor ky i fundit ka nxjerrë armën e zjarrit tip pistoletë dhe ka qëlluar në ajër në korridoret e selisë.
Fatmirësisht nga të shtënat nuk ka pasur të plagosur. Në vendin e ngjarjes policia ka sekuestruar disa gëzhoja si dhe armën e zjarrit. Rica u arrestua ditën e sotme nga blutë e Kurbinit pas kërkimeve intensive gjatë mbrëmjes së djeshme.
Discussion about this post