Kreu i diplomacisë europiane Josep Borrell ka deklaruar se bashkë me partnerët në OSBE do të zhvillojë bisedime përsa i përket situatës në Ukrainë. Ai shtoi se në këtë takim do të kërkohet që Rusia të paguajë për rindërtimin e infrastrukturës në shtetin e rrënuar nga lufta.
“Ne kemi sekuestruar pothuajse 20 mld euro nga oligarkët dhe njerëzit që mbështesin Rusinë dhe kontrollojmë rreth 300 mld nga burime financiare të bankës qendrore ruse. Këto para do të përdoren për të rindërtuar Ukrainën”, ka thënë Borell gjatë takimi ministror të Organizatës për Siguri dhe Bashkëpunim në Europë, në Lodz të Polonisë.
Kreu i diplomacisë evropiane denoncoi sulmin e Rusisë kundër Ukrainës, duke e konsideruar atë shkelje të së drejtës ndërkombëtare dhe parimeve të OSBE-së.
“Rusia ka sjellë luftë në Evropë, ka minuar kartën e Kombeve të Bashkuara dhe ka dështuar të respektojë detyrimet e saj ndërkombëtare” , tha ai.
Borrell tha gjithashtu se Evropa dhe bota “kanë nevojë për një rend të ri sigurie në Evropë, pasi Rusia shkatërroi plotësisht atë që kishim”.
Discussion about this post