Autorit të sulmit ndaj ish-kryeministrit Sali Berisha, Gert Shehu, i është komunikuar masa e arrestit nga policia në Spitalin e Traumës. 31-vjeçari ndodhet i shtruar aty për shkak të dhunës që i ushtruan protestuesit pas grushtit që i dha Berishës.
Siç duket dhe nga foto me pranga në duar dhe i ënjtur, Shehu firmos deklaratën e tij.
Ai nuk ka dhënë deklarime të plota, por ka thënë se do të flasë në një moment të dytë.
Kujtojmë se Shehu goditi mesditën e djeshme Berishën, në bulevardin “Dëshmorët e Kombit”, gjatë protestës të thirrur nga opozita.
Pas sulmit, autori u neutralizua nga truprojat e Berishës të cilët e goditën me shkelma e grushta në fytyrë e pjesë të tjera të trupit duke i shkaktuar edhe dëmtime.
Agresori është identifikuar me emrin, Gert Shehu, 31 vjeç, banues në Tiranë.
Fill pas ngjarjes, ai u shoqërua nga truprojat e Berishës drejt selisë së Partisë Demokratike dhe më pas u transportua me autoambulancë për mjekim më të specializuar në Spitalin e Trumës i shoqëruar edhe nga punonjës të policisë.
Policia e Tiranës njoftoi zyrtarisht se 31-vjeçari Shehu është person me precedent kriminal , për plagosje, prishje të qetësisë publike dhe në fushën e narkotikëve. Gjithashtu, sipas diagnozës klinike, të vënë në dispozicion nga familjarët, ai vuan nga çrregullime psikotike dhe trajtohej prej vitesh.
Discussion about this post