Selman Lajçi, 53-vjeçari nga Kosova i arrestuar në portin e Durrësit me një arsenal armësh në makinë pretendon se armët janë pasioni i tij. Në dëshminë që ka dhënë në Policinë e Durrësit menjëherë pas prangosjes ka deklaruar se është një gjahtar koleksionues dhe jo trafikant.
“Jam i dhënë pas qitjes dhe gjuetisë,”- citohet të ketë deklaruar 53-vjeçari.
“OraNeës” bën me dije se ai mësohet se ka paraqitur disa dokumente në gjuhën gjermane që sipas tij vërtetojnë blerjet e armëve që iu gjetën në makinë, në Zvicër, ku edhe është rezident. Por nuk dihet se përse ka vendosur që t’i sjellë në Durrës dhe ku do t’i vendoste armët e blera. E po ashtu, Selman Lajçi sërish është në shkelje të ligjit, pasi ai nuk ka leje për transportin e armëve të zjarrit.
Ndërkohë që aktualisht Policia dhe Prokuroria e Durrësit po punojnë për përkthimin e dokumentave të paraqitura si dhe do të kërkojnë nga autoritetet zvicerane të dhëna për 53-vjeçarin dhe aktivitetin e tij në Zvicër.
53-vjeçari Selman Lajçi u ndalua të enjten teksa po hynte në portin e Durrësit në kuadër të operacionit të koduar “Snajperi” pasi në makinën me të cilën mbërriti nga trageti i linjës Ankona-Durrës u zbuluan një pistoletë, një snajper, një armë gjahu, 1367 copë fishekë luftarak dhe 800 copë fishekë për armë gjahu. Ajo që bie në sy është fakti se jo të gjitha janë armë gjahu, ashtu siç pretendon Lajçi.
Discussion about this post