Pas deklaratës së presidentit serb se vendi i tij nuk do të dorëzohet, ka reaguar dhe kryeministri i Kosovës Albin Kurti. Ai u shpreh se po bashkëpunojnë me KFOR-in për të zgjidhur situatën në veri të vendit sa më shpejt dhe në mënyrë paqësore. Kurti tha se Kosova do të mbrohet me forcë dhe vendosmëri.
“Me zgjidhjen e çështjes së targave dhe vonesën e zgjedhjeve, bandave kriminale në veri të Kosovës u mungon edhe preteksti më i dobët për barrikada dhe sulme të dhunshme ndaj Policisë së Kosovës. Në bashkëpunim me KFOR-in, ne po punojmë për të adresuar situatën shpejt dhe në mënyrë paqësore”, ka shkruar kryeministri Kurti.
Ai thekson se presidenti dhe kryeministrja e Serbisë kanë kërcënuar edhe me agresion ushtarak duke kërkuar që të futet ushtria serbe në Kosovë.
Sipas Kurtit, Kosova nuk kërkon konflikt, por dialog dhe paqe. Mes të tjerash, Kurti ishte i qartë kur thotë se Republika e Kosovës do të mbrohet me forcë dhe me vendosmëri maksimale, një mesazh ky tepër i qartë për “aventurat kërcënuese” të Vuçiç.
“Presidenti dhe kryeministri i Serbisë kanë kërcënuar edhe me agresion ushtarak, duke kërkuar që ushtria serbe të kthehet në territorin tonë. Ne nuk kërkojmë konflikt, por dialog dhe paqe. Por më lejoni të jem i qartë: Republika e Kosovës do të mbrohet me forcë dhe vendosmëri”, ka shkruar Kurti.
Presidenti serb Aleksandar Vuçiç dje bëri të ditur se do t’i drejtohet KFOR-it me kërkesë për lejimin e dislokimit të trupave ushtarake dhe policore serbe në Kosovë.
Discussion about this post