Policia ka ndëshkuar një shofer në Lushnje, pasi qarkullonte me automjet në sens të kundërt. Ai është kapur në aksin rrugor “Lushnjë-Çermë”, dhe për pasojë u gjobit me 40.000 lekë nga uniformat blu, të cilët i pezulluan edhe lejen e drejtimit. Bëhet fjalë për shtetasin me iniciale M.S.
Njoftimi zyrtar i policisë:
Lushnje/ Qarkullonte me automjet në sens të kundërt, Policia ndalon dhe ndëshkon drejtuesin e automjetit.
Shërbimet e Policisë Rrugore Fier, bazuar në informacionet e marra për një shtetas që drejtonte automjetin në sensin e kundërt të lëvizjes, në aksin rrugor “Lushnjë-Çermë”, bënë të mundur identifikimin dhe shoqërimin e drejtuesit të automjetit, shtetasit M. S.
Në zbatim të neneve 174/1/a, 19, 22 dhe 127/3 të Kodit Rrugor, shërbimet e Policisë i kanë vendosur drejtuesit të automjetit, masën administrative 40 000 lekë të rinj, bashkë me masën plotësuese “Pezullimi i lejes së drejtimit”. Duke qenë se shtetasi M. S. ka vetëm leje drejtimi të huaj, masa plotësuese u konvertua me pagesën e dyfishit të masës administrative maksimale, të parashikuar për normën e shkelur, të Kodit Rrugor të vendit tonë.
Policia Rrugore Fier fton qytetarët të denoncojnë çdo rast të shkeljes së rregullave të qarkullimit rrugor, në Komisariatin Dixhital ose në numrin pa pagesë 112.
Discussion about this post