Arrestimi i katër personave në lidhje me një hetim kundër korrupsionit që përfshin anëtarë të Parlamentit Europian dhe një shtet të Gjirit, që thuhet se është Katari, mund të trondisë Brukselin në thelb, shkruan euronews.
Disa eurodeputetë, përfshirë nënpresidenten Eva Kaili, janë akuzuar se kanë pranuar shuma të mëdha parash nga një vend i Gjirit që raportohet se është pritës i Kupës së Botës, por Doha i ka mohuar akuzat.
Bashkëpresidenti i grupit të të Gjelbërve, Philippe Lamberts, bëri thirrje për një hetim parlamentar dhe që kjo çështje të diskutohet këtë javë në seancën plenare të asamblesë së fundit të vitit të BE. Hetimi do të hapet të hënën në atë që premton se do të jetë një seancë e zjarrtë.
Niels Fuglsang, një eurodeputet me Partinë Social Demokratike Daneze, vuri në dukje efektin e dëmshëm që ky skandal mund të ketë në bllok.
“Nëse ne mund të blihemi. Nëse anëtarët e Parlamentit Europian dhe politikanë të tjerë mund të blihen për të thënë gjëra të caktuara, për të votuar në mënyra të caktuara. Është një turp dhe e bën Europën më të dobët. Pra, është në interesin e të gjithëve që të arrijmë deri në fund të kësaj dhe të miratojmë rregulla për t’u siguruar që gjëra të tilla nuk duhet të ndodhin kurrë. Kjo që ndodhi është shumë e gabuar dhe ne kemi një punë të madhe për të bërë”, tha ai për Euronews.
Kjo aferë është “e turpshme dhe e patolerueshme” dhe dëmton reputacionin e Parlamentit, tha të dielën komisioneri i ekonomisë së BE Paolo Gentiloni.
Politikanët francezë të krahut të majtë kanë kritikuar skandalin, me eurodeputetin Manon Aubry, e cila ka kërkuar të diskutohet mbi këtë çështje. Të premten, policia belge organizoi 16 bastisje në të gjithë Brukselin. Janë sekuestruar rreth 600 mijë euro para cash, përveç pajisjeve kompjuterike dhe telefonave celularë.
Gjithashtu Kaili është arrestuar dhe i është hequr detyra si nënkryetare e Parlamentit Europian. Tre personat e tjerë që janë akuzuar mbeten anonimë. Por AP raportoi se numri i tyre përfshin një ligjvënës të BE-së dhe një ish-anëtar.
Para se të shpërthejë skandali, asambleja po shqyrtonte hyrjen pa viza në zonën Shengen për qytetarët e Katarit. Por Partia Popullore Europiane, Social Demokratët, Liberalët dhe të Gjelbërit kanë bërë thirrje për pezullimin e votimit për këtë çështje.
Discussion about this post