Sherr mes demokratëve në Kuvend, Baçi i afrohet Bardhit e Alibeajt

Ka nisur me debate seanca plenare e Kuvendit të Shqipërisë.

Në debat u përfshi zoti Alibeaj me Flamur Nokën lidhur me përjashtimin e tij nga grupi sëbashku me kryetaren e Kuvendit, Lindita Nikolla.

Deputeti i Partisë Demokratike, Flamur Noka, është shprehur se do të padisë kryetaren e Parlamentit në Gjykatën Kushtetuese, pasi emri i tij nuk figuron në Grupin Parlamentar të PD-së.

Ai i kërkoi t’i tregojë se ku është bazuar për largimin e tij.

Po gjakrat u nxehën më tej kur Tritan Shehu e quajti demokratin tjetër Enkelejd Alibeaj “diktator”.

Në përgjigje Alibeaj nuk e kurseu: Të tregoj unë diktatorin ty. Plak matuf! Legen!

Me Alibeajn replikoi dhe Noka: “Je kokrra e legenit, ta tregoj unë pastaj. Këtu, këtu. Do vij të ta tregoj ty edhe atij tjetrit. Legen”, i tha Noka.

Më pas, drejt Alibeajt dhe Gazment Bardhit u afrua deputeti Luan Baçi, ndërsa mes palëve vijuan debatet. Kolegë të tjerë demokratë ndërhynë për të shuar gjakrat.

Teksa situata u tensionua drejtuesja e seancës Nikolla vendosi ndërprerjen për disa minuta.