Tensionet në veri të Kosovës janë duke u përshkallëzuar e për këtë arsye Kosova ka kërkuar ndihmë tek partnerët ndërkombëtarë. Përmes një dokumenti trefaqësh, të cilin e ka siguruar RTV, Ministria e Punëve të Jashtme të Kosovës dhe Diasporës (MPJD), u është drejtuar vendeve të Bashkimit Evropian (BE), duke kërkuar nga ta të marrin masa ndaj Serbisë, e cila është duke tentuar të destabilizojë veriun e Kosovës, së fundmi me vendosjen e barrikadave.
Në letrën drejtuar BE-së, MPJD, ofron fakte kronologjike të asaj që ka ndodhur në veri të Kosovës.
“Në skenarin më të mirë, Serbia po përpiqet qëllimisht të destabilizojë Kosovën për të parandaluar përparimin e dialogut, veçanërisht në kontekstin e planit të sapo propozuar të BE-së (të mbështetur nga Franca dhe Gjermania) për normalizimin e marrëdhënieve”, thuhet në letrën dërguar BE-së.
Në këtë dokument po ashtu thuhet se “skenari më i keq”, instrumentalizimi i grupeve kriminale nga Serbia për ta përsëritur luftën e vitit 1999.
Në dokumentin e MPJD-së, dërguar BE-së, jepen detajet kronologjike nga data 10 dhjetor kur grupet kriminale serbe kishin vendosur barrikada në rrugët e komunave veriore, e deri te sulmet e fundit ndaj gazetarëve të mediumeve kosovare të cilët po raportonin nga veriu.
Në dokument po ashtu, përmenden deklaratat e presidentit të Serbisë, Aleksandër Vuçiç, i cili kishte thënë se “Millosheviçi ishte një udhëheqës i madh”.
Në dokumentin e MPJD-së, përmendet edhe ndalimi i politikanes serbe, Rada Trajkoviç, e cila ishte ndalur në kufirin Kosovë-Serbi, për më shumë se 20 orë, pa akses në ujë, ushqim dhe barna esenciale për të. Po ashtu, përmendet edhe protesta e grupeve kriminale e mbajtur me 18 dhjetor, të cilët kishin tentuar ta sulmojnë kufirin Serbi-Kosovë.
Ndër tjerash, dokumenti flet edhe për të shtënat me armë zjarri ndaj forcave të KFOR-it të cilët operojnë në Kosovë. Po ashtu, theksohen edhe sulmet ndaj gazetarëve, të cilët së fundmi ishin goditur me gurë të mëdhenj kështu duke u lënduar një gazetare dhe një shofer.
Në letër përmendet edhe raporti i ngushtë në mes të Rusisë dhe Serbisë, teksa u bëhet thirrje BE-së t’i dënojnë përpjekjet e Serbisë për ta destabilizuar jo vetëm Kosovën por edhe rajonit. MPJD ka kërkuar nga bashkësia ndërkombëtare ta nxisin Serbinë, që të rikthehet në dialog për normalizimin e marrëdhënieve, me njohjen reciproke në qendër të tij dhe t’i zgjidhin të gjitha çështjet në mënyrë paqësore.
Discussion about this post