Ministri i jashtëm Serb Ivica Daçiç ka kritikuar homologen shqiptare Olta Xhaçka, pasi sipas tij ajo po inkurajon kryeministrin e Kosovës Albin Kurti që të vijojë me provokime. Kujtojmë se dje Xhaçka u shpreh se Shqipëria është me Kosovën dhe i ka bërë autoriteteve të Serbisë të mos i justifikojnë as barrikadat e as grupet kriminale që po refuzojnë t’i largojnë ato.
“Të luash me zjarrin është ide shumë e keqe për të ardhmen e të gjithë fëmijëve tanë”, tha Xhaçka në një postim në Facebook. Daçiç për “Tanjug” u shpreh se Xhaçka “nuk ia ka kujtuar Kurtit se ka obligime ndërkombëtare”.
“Ajo nuk ia ka kujtuar Kurtit se ka obligim ndërkombëtar të zbatojë Marrëveshjen e Brukselit, Rezolutën 1244 dhe të gjitha dokumentet relevante, si dhe obligim për formimin e Asociacionit të Komunave me shumicë serbe, e të mos dërgojë njësite shqiptare të armatosura në veri dhe të mos arrestojë serbë vetëm se janë serbë”, tha Daçiç.
“Në vend që ta paralajmërojë që të mos e kërcënojë paqen dhe stabilitetin në rajon, ministrja shqiptare e inkurajon atë për provokime të mëtejshme. Prandaj ajo dhe gjithë bashkësia ndërkombëtare mbajnë një përgjegjësi të madhe për gjithçka që po ndodh dhe mund të ndodhë në Kosovë”.
Ai thotë se “Serbia do të bëjë gjithçka për paqen, me presidentin Aleksandar Vuçiç në krye, por po ashtu do të bëjë çdo gjë për të mbrojtur popullin serb nga terrori”.
Discussion about this post