Ky është polici që u kap me drogë, djali i zyrtarit të lartë

Efektivi i Policisë Rrugore Renato Feri u arrestua dhe u përjashtua nga strukturat e rendit pasi u kap me drogë në makinë. Ai u pikas nga forcat Shqiponja, duke ecur me shpejtësi tej normave të lejuara në afërsi të Pallatit me Shigjeta në Tiranë. Arrestimi i Ferit u bë në dhjetor, por autoritetet nuk kanë dhënë asnjë njoftim zyrtar. Pasi u pikas nga forcat Shqiponja, ata i kanë bërë me shenjë që të ndalonte por ai ka shtuar shpejtësinë duke rrezikuar jetën e njërit prej policëve.

Ndalimi u bë i mundur më pas në afërsi të rreth rrotullimit të TEG-ut. Pas kapjes, policia zbuloi se Renato Feri ishte koleg i tyre, efektiv i Rrugores. Brenda mjetit gjatë kontrollit u gjet kanabis sativa. Gjithashtu dhe në momentin që është kapur ai ka vazhduar ofendimet ndaj kolegëve të tij.

Renato Feri është djali i Arian Ferit, i cili është shef sektori i burimeve njerëzore në Drejtorinë e Përgjithshme të Policisë së Shtetit. Feri është përjashtuar me urdhër të kryepolicit Muhamet Rrumbullaku. Mbi të rëndojnë akuzat e kundërshtimit të punonjësve të policisë dhe prodhimi e shitja e lëndëve narkotike.