Shkrimtarja stis vdekjen, pas dy vitesh njofton se është gjallë

Susan Meachen është një shkrimtare e romancave e cila, për dy vitet e fundit, dihej se kishte vdekur.

Në tetor 2022, një postim në grupin The Ward në Facebook – një klub privat i fansave kushtuar Meachen – njoftoi se autorja kishte vrarë veten pasi ishte ngacmuar nga autorë të tjerë.

Vetëm një muaj para vdekjes së supozuar të Meachen, romancierja postoi në Facebook për afro 1300 miqtë e saj, duke u ankuar për problemet e saj në karrierë dhe industrinë letrare.

Meachen zbuloi në postim se ajo kishte tentuar më parë vetëvrasjen dhe se do të botonte librin e saj të fundit më 30 tetor.

Postimi që njoftonte vdekjen e Meachen, i cili pretendohej se ishte shkruar nga vajza e saj, thoshte se familja e Meachen dëshironte të nderonte kujtimin e nënës së tyre duke botuar librin që ajo kishte nisur, gjë që e bëri.

Romani i saj i fundit romantik, i titulluar “Dashuria të zgjasë një jetë”, tani është në shitje për 2,99 dollarë në Kindle.

Pas lajmit për vdekjen e parakohshme të Meachen, libradashësit dhe anëtarët e grupit The Ward në Facebook ndanë ngushëllimet e tyre.

Dy mbledhje fondesh u ndanë gjithashtu në faqen e Meachen në Facebook për të mbështetur parandalimin e vetëvrasjeve, në shkurt të vitit 2022, megjithëse asnjëri nuk duket se ka mbledhur para.

Redaktorët ofruan të batojnë pa pagesë romanin pas vdekjes së Meachen. Madje, një grup autorësh i kushtuan asaj një antologji.

Por më 2 janar, Susan Meachen çuditërisht u ringjall. Duke hyrë në grupin e “The ward” në Facebook nën llogarinë e saj personale në Facebook, Meachen njoftoi se nuk kishte vdekur.

“Kam debatuar se si ta bëj këtë një milion herë dhe ende nuk jam i sigurt nëse është e drejtë apo jo,” shkruhej në postimin e Meachen.

“Do të ketë shumë pyetje dhe shumë njerëz do të largohen nga grupi mendoj. Por familja ime bëri atë që ata menduan se ishte më e mira për mua dhe unë nuk mund t’i fajësoj ata për këtë. Për pak sa nuk vdisja nga dora ime dhe ata duhej të kalonin përsëri gjithë atë ferr. Kthimi në The Ward nuk do të thotë shumë, por tani jam në një vend më të mirë dhe shpresoj të shkruaj përsëri. Le të fillojë argëtimi.”

Autorët dhe miqtë e saj u habitën dhe u zemëruan nga postimi i saj.