Deputeti Ervin Salianji është shprehur se në kuadër të nismës së tij për të mbledhur firmat për shkarkimin e Enkelejd Alibeaj si kryetar grupi dhe për të zënë vendin e tij, do të takonte dhe ish-kreun e PD-së, Lulzim Basha. Ai tha me Bashën është takuar për herë të fundit në një aktivitet, por për këtë nismë nuk ka folur. Ai shtoi ndër të tjera se kur kjo nismë u mor vesh, takimi me Bashën nuk ishte më i mundur.
“Duhet të ketë qenë kohë më parë kur patëm një aktivitet. Në një takim normal. Si anëtar i një grupi të PD. Duhet të them që si anëtar i grupit parlamentar të Partisë Demokratike. Ne do të takonim edhe zotin Basha, rrallë vjen në parlament, por është pjesë e atij grupi. Nuk arritëm dot, sepse sapo u mor vesh që do të ndërmerrej një akt i tillë, u prish ky takim,”- tha Salianji.
Deputeti Salianji ka nisur të mbledhë firmat e deputetëve të grupit parlamentar të PD-së për të bashkuar Partinë Demokratike. Kjo nismë ka filluar prej javësh dhe deri më tani është raportuar se ka mbledhur 20 firma. Në mes të kësaj nisme, Alibeaj vendosi të përjashtonte katër deputetë nga grupi, me argumentin se nuk kishin reflektuar nga aktet e dhunës që ndodhën në selinë blu në protestën e 8 janarit. Qëllimi ishte pakësimi i firmave, por nisma vijon.
Discussion about this post