Partia Demokratike do të zhvillojë ditën e sotme mbledhjen e Kryesisë. Në fokus të diskutimeve mes anëtarëve do të jetë shqyrtimi i përmbledhjes së analizës së zgjedhjeve të 25 Prillit për fazën e parë të saj.
Po ashtu, pritet të shqyrtohen ndryshimet në statutin e PD-së, ku ditën e djeshme Komisioni i Përhershëm zgjodhi mes katër propozimesh, idetë reformuese të Lulzim Bashës, Fatbardh Kadillit, Edit Harxhit dhe një anëtari të këshillit Kombëtar, teksa vendosi të kalonte për miratim, vetëm propozimet e bëra nga kryetari i PD.
Propozimet e Bashës për zgjerimin e kryesisë, shtimin e sekretariateve dhe kalimin e kompetencës së vendosjes për marrëveshjet politike te Këshilli Kombëtar, e deri mos-prekja e mandatit të kryetarit të Partisë, u panë nga 9 anëtarët e Komisionit Statutor si të duhurat për demokratizimin e mëtejshëm të PD.
Në orën 18:00, do të jetë kryesia blu që do të kalojë një për një në diskutim të 11 propozimet e kryedemokratit Basha, ndërsa të shtunën këto propozime do të duhet të marrin edhe dritën jeshile të Kuvendit Kombëtar.
