Tirana bëri një goditje të madhe me blerjen e sulmuesit Redon Xhixha. Ish futbollisti i Laçit ka firmosur një kontratë tre vjeçare me bardheblutë që shtojnë cilësitë në sulm. Në një intervistë të dhënë së fundmi ai ka folur për arsyen që zgjodhi Tiranën dhe objektivat.
“Zgjodha Tiranën, pasi bisedova me familjarët dhe të afërmit e mi. Së bashku menduam që Tirana është ekipi perfekt për të vazhduar karrierën. Patët oferta të tjera gjatë kësaj vere. U fol për Partizanin, në Turqi e me radhë… Sigurisht që oferta kam pasur nga disa klube të Superiores, por edhe nga jashtë vendit, por vendosa për Tiranën.
Për sa i përket kampionatit, Tirana e ka treguar edhe më para që është një nga pretendentet kryesore për fitimin e titullit. Shpresoj që këtë vit ta ndihmoj dhe unë me sa më shumë gola që ta arrijmë qëllimin.
Unë nuk kam shkuar te Tirana të zëvendësoj asnjë. Kam ardhur të tregoj veten time. Të jap më të mirën dhe të bëj maksimumin për këtë ekip.
Objektivat e Tiranës dihen, ndërsa objektiv personal kam që të shënoj sa më shumë në portën e kundërshtarëve dhe të ndihmoj skuadrën.
Tirana sigurisht që është një trampolinë e shkëlqyer për t’u transferuar jashtë Shqipërie. Është ekipi më i madh në Shqipëri.
Për sa i përket Laçit, unë i jam shumë mirënjohës për atë çfarë ata kanë bërë për mua. Nuk do të harroj kurrë mundësinë që më kanë dhënë të luaj në Superiore dhe të tregoj aftësitë e mia.”
