Një ngjarje e rëndë është raportuar në Vlorë, ku Policia ka parandaluar një vrasje në familje! Mësohet se Gazmend Merkaj, ka tentuar që të vrasë me hanxhar të vëllanë e tij. Por kjo nuk është hera e parë që ai ka probleme me drejtësinë.
Në vitin 2019, Merkaj ka qenë i dënuar me 3.4 vite burg për “armëmbajtje pa leje”, edhe pse guxoi dhe tregoi disa prej krimeve të rënda në Vlorë, të cilat kishin të bënin me rrëmbime por edhe vrasje. Merkaj shkoi vetë në Komisariatin e Vlorës, u vetëparaqit në 1 gusht 2018 pas frikës se mund të ekzekutohej nga disa persona që kishte bashkëpunëtorë.
VETËDORËZIMI—Nga frika!
Gazmend Merkaj është vetëdorëzuar vetëm pak orë pasi kishte raportuar në policinë e Vlorës se në automjetin e tij tip BMË ishte vendosur një sasi eksplozivi. Por e gjitha ishte një alarm i rremë. Pas denoncimit të parë, Merkaj ka shkuar sërish në Polici, kësaj herë në Fier, ku ka dorëzuar një pistoletë që kishte pa leje dhe ka shfaqur gatishmërinë për të treguar një krim të rëndë. Bëhet fjalë për vrasjen dhe zhdukjen e bujshme të të riut Albano Xhaferit në Vlorë. Më konkretisht, i penduari ka treguar se e ka ndjerë veten të kërcënuar për t’u vrarë nga Ardit Kola, Aleksandër Çaushaj dhe Ilir Shakaj.
Vrasja e Xhaferit me urdhër të Harizaj
Sipas të penduarit Merkaj, pikërisht këta persona kanë vrarë me çekiç në makinë Albano Xhaferin dhe më pas trupin e tij e kanë zhdukur. E gjitha për llogari të të ndjerit, Edison Harizaj. Pas dëshmisë së tij, prokuroria e Vlorës urdhëroi arrestimin e dy personave Besart Zharzha, i cili është ende në burg dhe personin tjetër A.S., i cili ndodhet në gjendje të lirë. Bazuar në të dhënave që ka mbledhur prokuroria e Vlorës, ka arritur në konkluzionin se bazuar në veprimet e para hetimore, Albano Xhaferi është vrarë për shkak të mosmarrëveshjeve që mund të ketë pasur brenda ose jashtë shtetit me persona të tjerë dhe trupi është transportuar dhe fshehur për të bërë të pamundur zbardhjen e ngjarjes.
