Këshilli i Lartë i Prokurorisë zhvilloi sot, më (23.07.2021), mbledhjen plenare të radhës. Seanca u ndoq edhe nga përfaqësues të Ministrisë së Drejtësisë dhe programeve të asistencës për zbatimin e reformës në drejtësi, EURALIUS dhe OPDAT.
Me propozim të anëtarit të Këshillit, Kostaq Beluri dhe me miratimin e shumicës, rendit të ditës iu shtua pika për miratimin e lejes së papaguar për Eranda Laze, prokurore në Prokurorinë pranë Gjykatës së Shkallës së Parë Vlorë. Këshilli vendosi me shumicë votash, miratimin e lejes së papaguar për një periudhë 6-mujore, duke filluar nga data 01.09.2021.
Në vijim të procesit të vlerësimit të kandidatëve për prokurorë në Prokurorinë e Posaçme (SPAK), Këshilli zhvilloi sot paradite intervistat me kandidatët,
Adnan Xholi dhe Dorina Bejko, të cilët plotësojnë kushtet ligjore të parashikuara për procesin e vlerësimit të kritereve të posaçme etike dhe profesionale.
Në nisje të seancës së intervistave me dy kandidatët sipërpërmendur, anëtarët e Këshillit, Vatë Staka dhe Sandër Beci i kërkuan Këshillit përjashtimin e tyre nga vlerësimi dhe, rrjedhimisht, votimi për kandidatin Adnan Xholi, për shkak të konfliktit të interesit.
Me propozim të Komisionit të Posaçëm, Këshilli i Lartë i Prokurorisë miratoi listën me renditjen e kandidatëve si vijon:
1. Adnan Xholi, i vlerësuar me 183 pikë;
2. Dorina Bejko, e vlerësuar me 180 pikë.
Në vijim, Këshilli vendosi emërimin e tyre si prokurorë pranë Prokurorisë së Posaçme kundër Korrupsionit dhe Krimit të Organizuar.
Me votë unanime, Këshilli vendosi, gjithashtu, për 5 (pesë) caktime të përkohshme për një periudhë tremujore, nga data e hyrjes në fuqi të vendimit, si vijon:
1. Erjon Shehaj, në pozicionin e Drejtuesit të Prokurorisë pranë Gjykatës së Shkallës së Parë Lezhë;
2. Pierind Çukaj, në pozicionin e Drejtuesit të Prokurorisë pranë Gjykatës së Shkallës së Parë Pukë;
Durim Bedini, në pozicionin e Drejtuesit të Prokurorisë pranë Gjykatës së Shkallës së Parë Kavajë;
3. Julian Çafka, në pozicionin e Drejtuesit të Prokurorisë pranë Gjykatës së Shkallës së Parë Gjirokastër;
4. Lazër Çardaku, në pozicionin e Drejtuesit të Prokurorisë pranë Gjykatës së Apelit Shkodër.
Gjithashtu, Këshilli miratoi 3 (tre) raporte për analizimin e aftësisë profesionale të subjekteve të rivlerësimit, si vijon:
1. Z. Ermir Lelçi, prokuror në Prokurorinë pranë Gjykatës së Shkallës së Parë Shkodër;
2. Znj. Edlira Cufi, prokurore në Prokurorinë pranë Gjykatës së Shkallës së Parë Shkodër;
3. Znj. Silvana Lule, prokurore në Prokurorinë pranë Gjykatës së Shkallës së Parë Tiranë.
Pasi u njoh me relacionet e përgatitura nga Komisioni i Zhvillimit të Karrierës, Këshilli vendosi të vlerësojë të përfunduar, procedurën e verifikimit të pasurisë dhe figurës për prokuroren Dhorina Theodhori, kandidate për pozicionin e Drejtuesit të Prokurorisë pranë Gjykatës së Shkallës së Parë Korçë dhe për prokurorin Abaz Muça, kandidat për pozicionin e Drejtuesit të Prokurorisë pranë Gjykatës së Shkallës së Parë Mat. Pas këtij momenti ata lejohen të vijojnë me procedurat e mëtejshme të ngritjes në detyrë për pozicionin e Drejtuesit të Prokurorisë.
Shorti ka caktuar si relatorë, Alfred Balla, për fillimin e procedurës së ngritjes në detyrë për prokuroren Dhorina Theodhori dhe Bujar Sheshi, për fillimin e procedurës së ngritjes në detyrë për prokurorin Abaz Muça.
Këshilli vendosi deklarimin e mbarimit të statusit të magjistratit për shkak dorëheqjeje, për Agron Gjana, prokuror në Prokurorinë pranë Gjykatës së Shkallës së Parë Durrës. Dorëheqja jep efekt me datë 31.08.2021.
