Trajneri i Bajern Mynih, Julian Nagelsman ka analizuar skuadrën në vigjilje të sezonit të ri teksa e filloi me fazën sulmuese.
Gnabri (10), Sane (6), Koman (5) shënuan 21 gola në total sezonin e shkuar. Por Nagelsman kërkon më shumë nga krahët e tij dhe do të punojë taktikisht me ta për t’u marrë atyre më të mirën që në sezonin e tij të parë në Mynih: “Ata duhet të jenë në pozicionin e duhur në zonat e rrezikshme”.
Skuadrat e tij, Hofenhaimi dhe Lajpcigu, janë shquar për cilësinë e lojës së tyre. Sigurisht që te Bajerni dominimi i topit do të jetë edhe më i theksuar me 33-vjeçarin në stol, i cili zbulon edhe disa nga idetë e tij taktike që do të aplikojë në shtëpinë e rekordmenëve gjermanë: “Pres të bëjmë një nisje të guximshme të ndeshjes, pa shumë topa të gjatë dhe ndeshjen duhet ta kontrollojmë përmes një kundërpresingu të mirë dhe të vazhdueshëm”. Taktika është e qartë dhe Nagelsman konfirmon se ai nuk do të bëjë një revolucion në stolin e lojës së skuadrës, përveç disa korrigjimeve: “Shpresojmë të bëjmë hapa të vegjël për të përmirësuar ato gjëra që nuk po shkojnë shumë mirë”.
Në fund, Nagelsman jep edhe përshtypjet e para të punës me kampionët e Bundesligës: “Kam gjetur një mentalitet të shkëlqyer, plus cilësi të jashtëzakonshme. Nuk më duhet për t’i përmbysur gjërat kokëposhtë. Kjo është diferenca e madhe me klubet e tjera”. Por ai është i ndërgjegjshëm edhe për presionin që do të ketë në stolin e bavarezëve: “Sigurisht që nëse nuk fitoj, pasojat në Mynih do të jenë edhe më dramatike.
Në “Säbener Strasse” flitet vetëm gjermanisht. Trajneri i ri, Julian Nagelsman, i ushtron në gjuhën e tij të gjitha ushtrimet në qendrën stërvitore të Bajernit të Mynihut dhe për ata që nuk e zotërojnë ende mirë gjuhën gjermane, shërbimet e “përkthyesit” gjatë takimeve taktike i bën asistenti i Nagelsmanit, Dino Topmëler. “Bild” e ka fotografuar 40-vjeçarin në stërvitje këtë javë, ndërsa u përkthen francezëve Nianzu, Kuisons dhe Sarr. Topmëler flet rrjedhshëm gjuhën franceze, duke qenë se ka qenë trajneri i Dudelanzhit në Luksemburg. Ai po ndihmon edhe mbrojtësin e ri Omar Riçards, duke i shpjeguar anglezit detyrat e tij në stërvitje. Sigurisht që gjatë sezonit këto pamje do të bëhen më të rralla, me lojtarët që do të kenë nisur të përvetësojnë më mirë gjuhën gjermane.
