Deputeti i zgjedhur i Partisë Socialiste, Petro Koçi do të dëshmojë sot para hetuesve të Prokurorisë së Posaçme kundër Korrupsionit dhe Krimit të Organizuar, pas denoncimit që bëri për tenderat në Bashkinë e Fierit. Marrja në pyetje e Koçit vjen vetëm një javë pasi ai plasi ‘bombën’ në rrjetet sociale, teksa shkruante se tenderat janë në duart e mafias.
Nga ana tjetër SPAK ka nisur verifikimet për deklaratat e forta të të zgjedhurit të PS-së në Fier. Më 16 korrik, Petro Koçi akuzoi institucionet e qarkut të Fierit si të lidhura me krimin. Koçi fliste për tendera publikë në qarkun e Fierit që fitohen nga trafikantët e drogës. Por edhe pse nuk e tha me emër, i vetmi institucion që jep tendera në nivel lokal, është bashkia e drejtuar nga Armando Subashi.
Nga ana e Partisë Socialiste, këto deklarata i ka komentuar sekretari, Arben Pëllumbi, i cili tha se socialistët duhet të heqin dorë nga gjykimi popullor. Sinjali nga PS duket se bëri Petron të reflektojë, pasi dje me anë të një postimi në Facebook bëri hapa pas, duke ia atribuar fitoren e zgjedhjeve kryeministrit Edi Rama.
