Periudhë aspak e mirë për Elseid Hysaj ka qenë së fundmi, i cili pas sulmit nga tifozët e Lazios tashmë do të përballet në gjyq me Presidentin e klubit të Napolit, De Laurentiis.
‘Il mattino’ raporton se Napoli ka hedhur në gjyq lojtarin e kombëtares shqiptare për çështje disipline që fillojnë që nga viti 2019.
Presidenti De Laurentiis kërkon nga Hysaj 65 mijë euro, që i bie 25% e pagës mujore bruto. Shqiptari është informuar për këtë çështje para një jave dhe palët shumë shpejt do të përballen me njëra tjetrën në gjykatë.
Kjo e gjitha duket se ka filluar në vitin 2019, kohë kur Napoli shpallej nënkampion e Italisë nën drejtimin e Carlo Ancelotti, gjë e cila i siguroi edhe pjesëmarrjen në Champions League. Pas takimit me gjermanët Salzburg e vlefshme për Champions, Ancelotti nuk u paraqit në konferencë për shtyp dhe rrezikoi të gjobitej nga UEFA.
Në atë moment drejtuesit e klubit organizuan një grumbullim të detyruar për skuadrën në formë ndëshkimi, por të gjithë u larguan drejt shtëpiave të tyre përfshirë dhe lojtarin shqiptar. Ajo situatë e pakëndshme zgjati një javë dhe më pas lojtarët u shfaqën në stërvitje, ndërsa drejtuesit e Napolit u zotuan se do të merrnin masa të rënda ndaj tyre.
Duket se pas kalimit të Hysajt te klubi i Lazios, drejtuesit e Napolit janë kujtuar çfarë ndodhi në 2019-ën, duke i hapur telashe.
Situatë e cila të bën të mendosh që presidenti De Laurentis ka mllef me Hysajn që pas transferimit të tij drejt Lazios, pasi kjo gjë nuk ka ndodhur me lojtarët e tjerë të larguar nga Napoli./Gijotina.com
