Shtëpia e Bardhë njoftoi të hënën se më në fund ka arritur objektivin dhe se 70 për qind e të rriturve në SHBA janë tashmë të vaksinuar me të paktën një dozë.
Objektivin, administrata Biden e ka arritur gati një muaj pas afatit të caktua fillimisht.
Presidenti Biden parashikonte që të arrihej vaksinimi i 70 për qind të amerikanëve adultë deri më 4 korrik. Ai u premtoi qytetarëve se ky do të ishte një hap i madh drejt kthimit në normalitet. Megjithëse një muaj vonë, kjo shifër është lehtësim për punonjësit e shëndetësisë që po përballen aktualisht me një rritje të rasteve të nxitur nga varianti Delta.
Një ditë më parë, Florida theu rekordin e saj për shtrimet në spital të të sëmurëve me koronavirus. Me rritjen e numrit të të infektuarve, zyrtarët janë detyruar që t’u kthehen maskave dhe masave të tjera për të ndaluar përhapjen.
