Mançester Siti ka bërë lëvizjen e madhe të merkatos, duke përforcuar radhët e tij me një emër që pritet të ndihmojë skuadrën e Guardiolës të bëjë hapin e radhës drejt dominimit absolut në Angli e Europë. Talenti anglez Xhek Grilish ka firmosur me blutë e Mançesterit, duke u bërë pjesë e kampionëve në fuqi të Premier Ligës.
Grilish është zyrtarizuar sot, pasi ka kaluar vizitat mjekësore dhe Aston Vila pranoi të largonte lojtarin kryesor pasi Mançester Siti pagoi 100 milionë paund për kartonin e tij, duke vendosur një rekord të ri për futbollin britanik pasi ky është transferimi më i shtrenjtë i realizuar në këtë kampionat.
Grilish ka firmosur një kontratë 6-vjeçare me qytetarët, ndërsa atje do të mbajë fanellën me numrin 10, e cila ishte lënë bosh nga Kun Aguero.
“Jam jashtëzakonisht i lumtur që i jam bashkuar Mançester Sitit. Siti është skuadra më e mirë në vend, me një trajner që cilësohet më i miri në botë. Të bëhem pjesë e këtij klubi është një ëndërr që bëhet realitet”, ishin fjalët e futbollistit anglez pas firmës.
