Orët e vona të pasdites së kësaj të diele, u aktivizua një vatër zjarri në Voskopojë, ku flakët kanë depërtuar deri në thellësi të pyllit.
Forca të shumta zjarrfikëse dhe efektivë të FA ndodhen në zonë për të monitoruar situatën. Idriz Kuça, komandant i batalionit, shprehet se operacioni i tyre do të nisë nesër në të zbardhur, ku do të marrin pjesë 100 forca të FA dhe bashkisë së Korçës.
Ai u shpreh në një prononcim për mediat, se nesër do të përpiqet të izolohen flakët dhe të vendoset në normalitet situata.
“Do ta izolojmë besoj. Do të ndërhyjmë në të dy krahët. Zjarrfikësja nuk kalon, për shkak të terrenit të vështirë. Bashkia, e përballon nesër dhe e izolon, sepse zjarret janë të rrethuara. Ndërhyrja nga ajri do të ishte efektive, por do të duhet ta shohim nesër në mëngjes shkallën e plotë të zjarreve.
Të gjitha forcat, qoftë ato të FA dhe të bashkisë, nën drejtimin tonë do të kalojmë në krahun e poshtëm dhe do të krehim zonën e do të izolojmë e rrethojmë flakët. Është e realizueshme besoj”, tha Kuça.
