Militantët talibanë në Afganistan mund të mposhten vetëm nga një mision luftarak i gjatë dhe shumë i ashpër, ka thënë ministrja gjermane e Mbrojtjes Annegret Kramp-Karrenbauer.
“A janë shoqëria dhe parlamenti të gatshëm për të dërguar ushtrinë gjermane në luftë, që të qëndrojë aty për të paktën edhe një gjeneratë? Nëse jo, atëherë tërheqja me partnerët ka qenë vendimi i duhur”, ka thënë ajo përmes një postimi në Twitter, transmeton dpa.
Sipas saj, ata që janë duke bërë thirrje për intervenim të ri ushtarak në Afganistan, duhet të pyesin veten se cili do të ishte synimi dhe strategjia, si dhe kush do të ishin partnerët.
Secili që dëshiron të mposhtë talibanët për një kohë të gjatë, do të duhej të niste “mision luftarak shumë të ashpër dhe të gjatë”, ka thënë ajo.
Gjermania ka kompletuar procesin e tërheqjes së trupave të veta ushtarake nga Afganistani në qershor të këtij viti.
Forcat e udhëhequra nga Shtetet e Bashkuara kanë nisur të largohen nga Afganistani më 1 maj, pas gati 20 vjetëve luftë.
Që atëherë, talibanët kanë nisur ofensiva në rajone të ndryshme në Afganistan, me qëllim të zgjerimit të kontrollit.
Forcat e udhëhequra nga SHBA-ja kanë rrëzuar talibanët nga pushteti në tetor të vitit 2001.
Talibanët kanë qenë duke strehuar atëbotë Osama Bin Laden dhe figura tjera të Al-Kaidës, të lidhura me sulmet e 11 shtatorit të po atij viti në Shtetet e Bashkaura.
Presidenti amerikan Joe Biden ka thënë se tërheqja amerikane tani është e arsyeshme, pasi forcat amerikane janë siguruar që Afganistani nuk do të bëhet më bazë për xhihadistë të huaj që të kryejnë komplote kundër Perëndimit. /REL
