Në kuadër të kontrolleve masive të territorit me qëllim parandalimin dhe goditjen e veprimtarisë kriminale në fushën e kultivimit të bimëve narkotike, policia e shtetit njofton se ka vënë në pranga katër shtetas në Dibër.
Strukturat e Hetimit të Krimit në DVP Dibër ka zbuluar se në bregun e lumit Drini i Zi, në fshatin Draj Reç, disa shtetas kishin kultivuar bimë narkotike. Gjatë kontrollit u bë e mundur kapja dhe ndalimi i personave Bujar Tanushi, 35 vjeç; Edmond Tanushi, 37 vjeç; Rrahman Tanushi, 27 vjeç; Fitim Tanushi, 23 vjeç, të gjithë banues në fshatin Zall Reç, Dibër.
Sipas policisë këta shtetas në bashkëpunim me njëri – tjetrin dyshohet se janë autorët të kultivimit të bimëve narkotike në bregun e lumit Drini i Zi. Ndërkohë vijon puna për identifikimin dhe kapjen e autorëve të tjerë të implikuar në këtë aktivitet kriminal. Në njoftimin e policisë gjithashtu thuhet se materialet procedurale i kaluan Prokurorisë pranë Gjykatës së Shkallës së Parë Dibër, për veprën penale “Kultivim i bimëve narkotike”, kryer në bashkëpunim.
