Ish-lojtari i Manchester United, braziliani Anderson mund të dënohet me 10 vite burgim. Ai akuzohet se ka qenë pjesë e një organizate kriminale e përbërë nga 8 persona që kanë vjedhur, mashtruar dhe kanë bërë pastrim parash.
Thuhet se ai ka qenë pjesë e një grupi që ka vjedhur dhe pastruar sasi të mëdha parash kripto. Duket se rreth 5 milionë euro janë vjedhur nga kompanitë e mëdha në industrinë e çelikut duke devijuar në mënyrë të paligjshme paratë dhe kjo shumë është pastruar përmes blerjes së kriptomonedhës.
Apartamenti i Andersonit në Porto Alegre ishte kontrolluar nga policia vitin e kaluar dhe kompjuteri i tij ishte sekuestruar. Braziliani ka konfirmuar se shkëmben kriptovaluta, por mohon çdo lloj akuze tjetër.
“Një hetim është duke u kryer dhe Anderson e di këtë, por ai do të tregojë se ai është viktimë dhe jo agresor,”-tha për ‘Globo’ avokati i ish -lojtarit, Julio Cezar Coitinho Junior.
Ndërkohë rikujtojmë se Anderson ishte pjesë e Manchester United nga viti 2007- 2015, ndërsa në moshën 33-vjeçare ai i dha fund të luajturit futboll./Gjotina.com
