Jeta e muratorit shqiptar, Gazment Bushi, ka përfunduar në tragjedi në momentin që po kalonte vijat e bardha për të blerë një shishe ujë në një lokal.
Teksa po kalonte rrugën i shoqëruar nga një mik i tij, një makinë e tipit “Porsche”, drejtuesi i të cilit ishte në gjendje të dehur, erdhi me shpejtësi të lartë dhe e përplasi shqiptarin për vdekje duke e hedhur mbi 100 metra në asfalt.
Gazmenti në ato momente kishte dalë për një darkë me miqtë në Tarracën Mascagni, teksa kishte lënë në shtëpi gruan bashkë me dy fëmijët e vegjël.
Ai ishte i treti nga pesë vëllezërit dhe punonte murator në Itali në firmën e vëllait të tij, Edli Bushi.
Bushi u transportua i gjallë në spital falë masazhit kardiak, por dëmtimi i rëndë në kokë ia bëri të pamundur mbijetesën.
Ndërsa shoferi 33-vjeçar, i cili drejtonte makinën “Porsche”, u arrestua nga Policia.
