Javën që lamë pas është shënuar një numër i madh i të infektuarve me coronavirus në Kosovë, ndërsa kjo ka bërë që të ketë edhe rritje të rasteve që kërkojnë hospitalizim.
Drejtori i Shërbimit Spitalor Klinik dhe Universitar, Valbon Krasniqi, një ditë më parë bëri të ditur se ka rritje drastike të numrit të pacientëve me Covid që kërkojmë trajtim spitalor. Sipas tij, çdo ditë po shtrohen në spitale gati 100 pacientë.
E për shkak të kësaj situate, Krasniqi ka thënë se detyrohen që në spitale të trajtojnë vetëm rastet e rënda, ndërsa kërkoi që pacientët të trajtohen edhe në qendra të mjekësisë familjare.
Krasniqi tha se nga dita e hënë në klinikat e QKUK-së do të reduktohen shumë shërbime në mënyrë që mjekët të fokusohen te pacientët me coronavirus, shkruan “Telegrafi”.
“Jemi të detyruar t’i pezullojmë operacionet jo emergjente, ndërsa vizitat do të reduktohen në 50%. Kërkojmë ndjesë edhe ndaj punëtoreve shëndetësorë pasi jemi detyruar të ndërpresim edhe pushimet e tyre vjetore që të kemi personel të mjaftueshëm për trajtimin e pacientëve”, deklaroi ndër të tjera Krasniqi.
Drejtori i SHKUK-së tha se për herë të parë në Klinikën e Pediatrisë janë të shtruar 10 fëmijë të prekur me coronavirus.
